“Sea Breeze” ərazisində kino həvəskarları üçün yeni məkan yaradılacaq. Layihə çərçivəsində müasir nümayiş imkanlarına malik çoxzallı kinoteatrın istifadəyə verilməsi planlaşdırılır.
Elpress.az xəbər verir ki, “Sea Breeze” və “CineMastercard” kinoteatrlar şəbəkəsi “Venetian Harbour” kompleksində kinoteatrın yaradılması ilə bağlı razılığa gəlib. Müvafiq müqavilə tərəflər arasında imzalanıb.
Yeni kino məkanı “Marina Venetian Harbour” layihəsinin tərkibində yerləşəcək. Halfmoon yarımadası yaxınlığında inşa olunan kompleksin konsepsiyasında restoranlar, mağazalar və istirahət zonaları ilə yanaşı, sahilyanı piyada məkanlarının yaradılması da nəzərdə tutulur.
24 430 kvadratmetr icarə sahəsinə malik “Venetian Harbour”un layihəsi memar Sergey Çobana məxsusdur. Kompleksin diqqətçəkən hissələrindən biri isə ətrafında açıq meydanların, restoranların və yaşıllıq sahələrinin yerləşdiriləcəyi mayak qülləsi olacaq.
“CineMastercard”ın yeni kinoteatrında tamaşaçılar üçün müasir kino texnologiyalarından istifadə ediləcək. Şəbəkənin mövcud kinoteatrlarında 4DX və ScreenX formatları, həmçinin Skybox və VIP Diamond zalları təqdim olunur.
Müqaviləni “Sea Breeze” şirkətinin kommersiya icarəsi üzrə direktoru Elbəy Rzayev və “CineMastercard”ın baş direktoru Zaur Darabzadə imzalayıblar.
