Türkiyədə qarşıdakı dövr üçün sənaye siyasətinin formalaşdırılmasında regional nəqliyyat marşrutları da nəzərə alınır. Yeni sənaye zonalarının yerləşdirilməsi və istehsal gücünün bölüşdürülməsi planlarında Zəngəzur dəhlizi əsas istiqamətlərdən biri kimi müəyyənləşdirilib.
Elpress.az xəbər verir ki, Türkiyənin sənaye və texnologiyalar naziri Mehmet Fatih Kacır ölkədə yeni sənaye zonalarına investisiya planlarından danışarkən bu məsələyə toxunub.
Nazirin sözlərinə görə, Zəngəzur dəhlizi ilə yanaşı, İraqın cənubunu Türkiyə ilə birləşdirəcək “İnkişaf yolu” marşrutu da sənaye siyasətində nəzərə alınacaq. Bu istiqamətlər üzrə nəqliyyat bağlantısının gücləndirilməsi ölkə ərazisində sənaye yükünün uzunmüddətli perspektivdə daha səmərəli paylanmasına xidmət edəcək.
İlk mərhələdə Samsun-Mersin xətti üzərində yerləşən 15 vilayətdə 19 sənaye zonasının yaradılması nəzərdə tutulur. Növbəti mərhələdə isə Anadoluda Mersin-Şırnak, Sivas-Iğdır və Trabzon-Şırnak istiqamətlərində sənaye inkişaf dəhlizlərinin formalaşdırılması planlaşdırılır.
Mehmet Fatih Kacır bildirib ki, yeni sənaye zonalarının əsas nəqliyyat marşrutlarına çıxışının təmin edilməsi Türkiyənin məhsul təchizat zəncirlərindəki rolunu gücləndirə bilər.
O, həmçinin yeni meqasənaye zonalarında ağıllı istehsal və yaşıl texnologiyalara üstünlük veriləcəyini qeyd edib. Liman, dəmir yolu və avtomobil yollarına yatırımların isə logistika xərclərinin azaldılmasına imkan verəcəyi bildirilib.
Nazirin sözlərinə görə, Türkiyənin ÜDM-i son 23 ildə 238 milyard dollardan 1,6 trilyon dollara yüksəlib. Ölkənin 2030-cu ilədək innovasiya sahəsinə 30 milyard dollar investisiya yatırmağı planlaşdırdığı da açıqlanıb.
