Qarabağ və Şərqi Zəngəzurda abidələrin inventarlaşdırılmasına minalar mane olur
Elpress.az xəbər verir ki, Qarabağ və Şərqi Zəngəzur iqtisadi rayonlarında yerləşən 130 mədəni irs abidəsinin inventarlaşdırılması hələ tamamlanmayıb.Bildirilib ki, bunun əsas səbəbi həmin ərazilərin mina və partlamamış hərbi sursatlarla çirklənməsidir. Bu səbəbdən bəzi abidələrə təhlükəsiz şəkildə baxış keçirmək və onların vəziyyətini ətraflı qiymətləndirmək mümkün deyil.Qeyd olunub ki, azad edilmiş ərazilərdə bərpa və quruculuq işləri insan və mədəniyyət mərkəzli yanaşma əsasında həyata keçirilir. Tarixi abidələrin bərpası, mədəniyyət müəssisələrinin yenidən fəaliyyətə başlaması, müasir şəhər və “ağıllı kənd”lərin salınması, eləcə də yaşıl enerji infrastrukturunun qurulması istiqamətində işlər davam etdirilir.Bildirilib ki, Böyük Qayıdış yalnız insanların doğma torpaqlarına yerləşdirilməsi ilə məhdudlaşmır. Qayıdan sakinlərin özlərini doğma yurdlarında hiss etməsi üçün həmin ərazilərin tarixi və mədəni irsinin qorunması da mühüm əhəmiyyət daşıyır.
