İsveçdə keçirilən növbəti ümumi seçkilərdə azərbaycanlı soydaşlarımız da uğur əldə ediblər. Müxtəlif siyasi partiyaların namizədləri olan 6 soydaşımız ölkənin parlament, regional və bələdiyyə qurumlarında təmsil olunmaq hüququ qazanıb.
Elpress.az xəbər verir ki, İsveçdə Riksdaqla yanaşı, 21 regional və 290 bələdiyyə şurasına seçkilər keçirilib.
Səsvermənin nəticələrinə əsasən, Sosial-Demokrat Fəhlə Partiyasının üzvü və nəqliyyat siyasəti üzrə sözçüsü Aylin Nuri İsveç Parlamentinə seçilib. Mərkəz Partiyasının təmsilçisi Aidə Kərimli isə Västra Götaland Region Şurasında mandat əldə edib və Riksdaqda əvəzedici deputat olub.
Digər soydaşlarımız da bələdiyyə səviyyəsində seçki uğuru qazanıblar. Turan Əliyev Partille, Aytac Quliyeva Haninge, Aygün Ələkbərova Älvkarleby, Rihad Ələkbərov isə Gävle Bələdiyyə Şurasına seçilib.
Soydaşlarımızın İsveçin müxtəlif siyasi təşkilatlarında fəaliyyət göstərməsi və seçkili qurumlarda təmsil olunması onların ölkənin ictimai-siyasi həyatında iştirakının genişləndiyini göstərir.
