Xalq şairi Səməd Vurğunun anadan olmasının 120 illiyi münasibətilə onun həyat və yaradıcılığına həsr olunmuş elektron məlumat bazası istifadəyə verilib.
Elpress.az-ın Kulis.az-a istinadən verdiyi məlumata əsasən, Prezident İlham Əliyevin Səməd Vurğunun 120 illik yubileyinin keçirilməsi ilə bağlı imzaladığı sərəncamın icrası çərçivəsində Cəfər Cabbarlı adına Respublika Gənclər Kitabxanası tərəfindən silsilə maarifləndirici və mədəni layihələr həyata keçirilir. Bu layihələrdən biri kimi şairin zəngin ədəbi irsini əhatə edən elektron məlumat bazası hazırlanaraq oxucuların istifadəsinə təqdim olunub.Elektron resursda Səməd Vurğunun həyat yolu, çoxşaxəli yaradıcılığı və onun haqqında formalaşmış elmi-ədəbi irs sistemli şəkildə təqdim edilir. Layihənin əsas məqsədi şairin yaradıcılığının daha geniş auditoriyaya çatdırılması, milli ədəbiyyatdakı əvəzsiz rolunun təbliği və gələcək nəsillərə tanıdılmasıdır.Məlumat bazasında akademik Nizami Cəfərov, professorlar Vaqif Yusifli, Maarifə Hacıyeva, Fazil Qaraoğlu, filologiya üzrə fəlsəfə doktoru Elnarə Qaragözova, eləcə də Xalq şairi Vaqif Səmədoğlu və digər müəlliflərin Səməd Vurğuna həsr olunmuş məqalələrinin tam mətnləri yer alır. Bundan başqa, bazada şairin müəllifi və redaktoru olduğu kitablar, dram əsərləri, poemalar, şeirlər, müxtəlif dillərdə nəşr edilmiş əsərlər, onun haqqında yazılmış kitablar, dissertasiyalar, musiqi əsərləri və digər elektron resurslar barədə geniş məlumat təqdim olunur.
