Rusiya-Ukrayna müharibəsində həkim kimi xidmət edən azərbaycanlı Vahab Quliyev döyüşlər zamanı həyatını itirib.
Elpress.az xəbər verir ki, Lənkəranın Separadi kəndindən olan 1968-ci il təvəllüdlü Vahab Ramazan oğlu Quliyev müharibənin ilk ilindən sonra Ukrayna tərəfindən hərbi xidmətə cəlb olunub və ixtisası üzrə tibbi fəaliyyət göstərib.
Xidmət müddətində iki dəfə yaralanan V.Quliyev müalicə aldıqdan sonra yenidən döyüş bölgəsinə qayıdıb. O, bir neçə gün əvvəl Kupyansk istiqamətində xidməti vəzifəsini yerinə yetirərkən PUA hücumu nəticəsində həlak olub.
Məlumata görə, Vahab Quliyev 1986-cı ildə Ukraynada Tibb İnstitutunun Əczaçılıq fakültəsinə qəbul olunub. 1993-1994-cü illərdə dissertasiya işi hazırlayıb və Moskvada müdafiə edərək tibb elmləri namizədi elmi dərəcəsi alıb.
V.Quliyev 30 ildən artıqdır Ukraynada yaşayırmış. O, məşhur “Nənələr” folklor klubunun üzvü Xanımbacı Quliyevanın oğludur.
Hazırda mərhumun nəşinin Azərbaycana gətirilməsi və doğulduğu Separadi kəndində dəfn olunması istiqamətində tədbirlər görülür.
