Yeni modeldə kitabxanaların rəqəmsallaşdırılması və müasir mədəniyyət mərkəzlərinə çevrilməsi nəzərdə tutulur
Elpress.az xəbər verir ki, Azərbaycanda kitabxana sisteminin yenilənməsi və xidmətlərin müasir tələblərə uyğunlaşdırılması məqsədilə yeni model hazırlanır.Mədəniyyət nazirinin müavini Fərid Cəfərov bildirib ki, ölkədə mövcud olan təxminən 3 400 kitabxananın böyük hissəsi bina, struktur və xidmət imkanları baxımından beynəlxalq standartlara cavab vermir. Eyni zamanda, sistemdə peşəkar kadr çatışmazlığı da əsas problemlərdən biri kimi göstərilir.Məlumata görə, kitabxana fondunun 57,6 faizi kiril qrafikasında olan nəşrlərdən ibarətdir. Hazırda kitabxanaların yalnız 20 faizində internet təminatı mövcuddur, 96 faizində isə avtomatlaşdırılmış kitabxana idarəetmə sistemi tətbiq edilməyib.Yeni model çərçivəsində ictimai kitabxanaların IFLA standartlarına uyğunlaşdırılması, xidmətlərin avtomatlaşdırılması və elektron kitabxana sisteminin yaradılması planlaşdırılır. Bununla vətəndaşların kitabxana xidmətlərindən mobil telefon vasitəsilə də yararlanması nəzərdə tutulur.Yeni sistemdə kitabxanaların yalnız kitab oxunan məkan deyil, müasir oxu zalları və müxtəlif mədəni fəaliyyətlərin keçirildiyi mərkəzlər kimi fəaliyyət göstərməsi planlaşdırılır. Kitab fondlarının da beynəlxalq standartlara uyğun yenilənməsi nəzərdə tutulur.Bundan başqa, yalnız şəxsiyyət vəsiqəsi ilə ölkə üzrə kitabxana sisteminin müxtəlif filiallarından istifadə imkanının yaradılması, səyyar kitabxana xidmətlərinin genişləndirilməsi və kitabxana xidmətlərinin 24 saat əlçatan olması məqsədlər sırasında yer alır.İnklüziv oxucular üçün audio kitablar, Brayl əlifbasında nəşrlər və kitabların ünvana çatdırılması kimi xidmətlərin yaradılması da nəzərdə tutulur. Açıq rəf sisteminin, elektron kitab sifarişinin tətbiqi, əməkhaqlarının artırılması və kitabxana işçilərinin fəaliyyətinin daha sistemli təşkil olunması da yeni modelin əsas istiqamətləri sırasındadır.
