Türkiyənin hakim Ədalət və İnkişaf Partiyasının (AK Parti) sözçüsü Ömer Çelik Ankara ilə Bakı arasındakı münasibətlərin möhkəmliyindən danışıb.
Elpress.az Haber Global-a istinadən xəbər verir ki, Ömer Çelik Türkiyə və Azərbaycanın “bir millət, iki dövlət” prinsipi əsasında yaxın əlaqələrə malik olduğunu bildirib.
O qeyd edib ki, iki ölkənin daxili siyasətində və ayrı-ayrı məsələlərə yanaşmasında fərqli mövqelərin olması mümkündür. Bununla belə, fikir ayrılıqlarının dialoq yolu ilə müzakirə edildiyini və münasibətlərin inkişafının davam etdiyini vurğulayıb.
AK Parti sözçüsü Türkiyə Prezidenti Rəcəb Tayyib Ərdoğanla Azərbaycan Prezidenti İlham Əliyev arasındakı münasibətləri də yüksək qiymətləndirib. Onun sözlərinə görə, iki lider arasında səmimi qardaşlıq əlaqələri mövcuddur.
Ömer Çelik Türkiyə və Azərbaycan münasibətlərinə müdaxilə etməyə çalışan ölkələrin olduğunu da deyib. O, belə cəhdlərin nəticə verməsinə imkan verilməyəcəyini bildirib.
Partiya rəsmisi Türkiyədə bəzi qrupların və sosial şəbəkə istifadəçilərinin Azərbaycanı düzgün olmayan şəkildə hədəfə aldığını da qeyd edib.
