Azərbaycan Milli İncəsənət Muzeyində media nümayəndələri üçün təşkil olunan press-tur çərçivəsində muzeyin fəaliyyəti, kolleksiyası və yeni layihələri təqdim edilib.
Elpress.az AZƏRTAC-a istinadən xəbər verir ki, oktyabrın 7-də keçirilən tədbirdə jurnalistlər muzeyin ekspozisiyası ilə tanış olub, burada qorunan sənət əsərləri və keçirilən sərgilər barədə məlumat əldə ediblər.
Proqramın davamında muzeyin direktoru, sənətşünaslıq üzrə fəlsəfə doktoru Şirin Məlikova ilə görüş keçirilib. Görüşdə muzeyin hazırkı fəaliyyəti, yeni mövsüm üçün nəzərdə tutulan layihələr, sərgi və maarifləndirmə istiqamətində görüləcək işlər müzakirə olunub.
Press-turun diqqətçəkən məqamlarından biri fotoqraf Rauf Əskəri Nəsirovun “Əksetmə” adlı fotosərgisinin açılışı olub.
Ekspozisiyada fotoqrafın gündəlik həyatdan seçdiyi müxtəlif məqamlar fərqli bədii yanaşma ilə təqdim edilir. Əsərlərdə işıq və kölgə, əkslər və məkan arasındakı əlaqələr xüsusi yer tutur.
Sərgi müəllifin adi görünən detallara fərqli rakursdan yanaşmasını və onların estetik imkanlarını foto sənəti vasitəsilə göstərməsini əks etdirir.
