Naxçıvan Avtomobil Yolları Dövlət Agentliyinin idarəetmə sistemində dəyişiklik edilib. Yeni qərarla İdarə Heyətinin formalaşdırılması ilə bağlı səlahiyyətlər yenidən müəyyənləşdirilib.
Elpress.az xəbər verir ki, “Naxçıvan Avtomobil Yolları Dövlət Agentliyi” publik hüquqi şəxsin Nizamnaməsinə dəyişiklik edilməsi barədə qərar imzalanıb.
Dəyişikliyə əsasən, Agentliyin İdarə Heyətinə sədr və iki sədr müavininin təyin olunması Naxçıvan Muxtar Respublikasının baş naziri tərəfindən həyata keçiriləcək. Təyinatlar Naxçıvanda Azərbaycan Prezidentinin səlahiyyətli nümayəndəliyi ilə razılaşdırılacaq.
Bununla yanaşı, Agentliyin illik hesabatının təqdim ediləcəyi qurum da dəyişdirilib. Bundan sonra hesabat Naxçıvan Ali Məclisinin sədrinə deyil, Naxçıvan Muxtar Respublikasının Nazirlər Kabinetinə təqdim olunacaq.
Qeyd edək ki, hazırda Naxçıvan Ali Məclisinin sədri vəzifəsinin səlahiyyətlərini Bəxtiyar Məmmədov icra edir. Muxtar respublikanın baş naziri isə Cabbar Musayevdir.
