BMT-nin Cenevrə Ofisində MAMA “Ana təbiət” adlı beynəlxalq incəsənət layihəsinin təqdimatı keçirilib.
Elpress.az-ın Yeniçağ-a istinadən verdiyi məlumata görə, tədbirdə Azərbaycan Respublikası Prezidentinin köməkçisi, Heydər Əliyev Fondunun icraçı direktoru Anar Ələkbərov, BMT-nin Cenevrə Ofisinin baş direktoru Tatyana Valovaya, müxtəlif beynəlxalq təşkilatların nümayəndələri, sənət ictimaiyyəti və qonaqlar iştirak ediblər.
Sərgi Heydər Əliyev Fondu, IDEA İctimai Birliyi və Azərbaycanın BMT-nin Cenevrədəki bölməsi yanında daimi nümayəndəliyinin birgə təşkilatçılığı ilə ərsəyə gəlib. Açılış mərasimi Millətlər Sarayının əsas və simvolik məkanlarından hesab olunan Salle des Pas Perdus zalında baş tutub.
Azərbaycanın BMT yanında daimi nümayəndəsi Qalib İsrafilov çıxışında layihənin incəsənət vasitəsilə ekoloji problemlərə diqqət çəkdiyini bildirib. Onun sözlərinə görə, təşəbbüs müxtəlif ölkələrdən olan rəssamları bir araya gətirərək təbiətin qorunması ilə bağlı qlobal mesaj verir.
Tədbirdə layihənin müəllifi Leyla Əliyevaya təşəkkür edilib və sərginin insanlarda təbiətə qarşı daha məsuliyyətli münasibət formalaşdıracağı vurğulanıb.
Tatyana Valovaya isə çıxışında layihənin insan, cəmiyyət və təbiət arasındakı əlaqəni xüsusi şəkildə əks etdirdiyini qeyd edib. O bildirib ki, ətraf mühitin qorunması BMT-nin əsas prioritet istiqamətlərindən biridir və bu kimi təşəbbüslər ictimai maarifləndirmə baxımından mühüm rol oynayır.
Layihə ilk dəfə 2024-cü ildə Heydər Əliyev Mərkəzində keçirilən COP29 çərçivəsində təqdim olunub. Daha sonra sərgi Manama, Roma, London, Tbilisi, Berlin və Tiranada nümayiş etdirilərək beynəlxalq platformaya çevrilib.
Sərgidə nümayiş olunan əsərlər insanın təbiətlə münasibətinə yeni baxış formalaşdırır və ekoloji problemlərə daha həssas yanaşmağa çağırış edir.
