Misirdə yaşayan azərbaycanlı alim və Misir-Azərbaycan Dostluq Cəmiyyətinin sədri Seymur Nəsirovun Bakıda keçirdiyi görüşlər ərəb mediasının diqqətini cəlb edib.
Elpress.az xəbər verir ki, Seymur Nəsirov Misirin Azərbaycandakı fövqəladə və səlahiyyətli səfiri Hüsaməddin Effat Mustafa Reza ilə görüşərək iki ölkə arasında elmi və mədəni əlaqələrin inkişafı, eləcə də azərbaycanlı tələbələrin Misirdə təhsil imkanlarının genişləndirilməsi məsələlərini müzakirə edib.
Görüş zamanı səfir Misirdə təhsil almaq istəyən azərbaycanlı tələbələrə dəstək göstərməyə hazır olduqlarını bildirib.
Seymur Nəsirov həmçinin Misir Səfirliyinin Mədəniyyət və Təhsil Əlaqələri Mərkəzinin direktoru, professor Tariq Əbu əl-Fütuhla görüşüb. Tərəflər təhsil, elm və mədəniyyət sahələrində əməkdaşlığın genişləndirilməsi barədə fikir mübadiləsi aparıblar. Görüşün sonunda Seymur Nəsirova “Təşəkkür” və “Təqdir” sertifikatları təqdim olunub.
Qeyd edək ki, azərbaycanlı tədqiqatçı-alim ötən il Misir Prezidenti Əbdülfəttah əs-Sisi tərəfindən iki ölkə xalqları arasında elmi, mədəni və intellektual əlaqələrin inkişafına töhfələrinə görə I dərəcəli “Elm və fənlər” ordeni ilə təltif edilib. Hazırda Seymur Nəsirov Qahirə Universitetinin Ədəbiyyat fakültəsində Azərbaycan dili müəllimi kimi fəaliyyət göstərir.
Seymur Nəsirovun Bakıda keçirdiyi görüşlərlə bağlı məlumatlar ərəb mediasında da yayımlanıb.
