Rusiya Təhsil Akademiyasının Ekoloji Təhsil Problemləri üzrə Elmi Şurasının plenumunda professor Nizami Məmmədov tərəfindən yaradılan “Ətraf Mühit Təhsilinin Fəlsəfəsi” elmi məktəbi rəsmi şəkildə tanınıb.
Qərarda məktəbin nəzəri prinsiplərinin orta və ali təhsil müəssisələrində geniş tətbiqi tövsiyə olunub. Nizami Məmmədov bildirib ki, bu tanınma uzun illərin elmi fəaliyyətinin nəticəsi olmaqla yanaşı, ekoloji təhsil ideyalarının müasir dövrdə nə qədər aktual olduğunun göstəricisidir. Onun sözlərinə görə, ətraf mühit problemlərinin həlli yalnız texnoloji yeniliklərlə mümkün deyil, cəmiyyət və təbiət arasında harmoniyanı əks etdirən yeni düşüncə tərzinin formalaşdırılması da zəruridir.Alim vurğulayıb ki, insanın sağlam və təhlükəsiz mühitdə yaşamaq hüququ ekoloji təhsilin əsasını təşkil edir. Bu səbəbdən ekoloji düşüncə müasir insanın dünyagörüşünün ayrılmaz hissəsinə çevrilməlidir.
Qeyd edək ki, Nizami Məmmədov 50 illik elmi-pedaqoji fəaliyyəti dövründə 400-dən çox elmi əsərin müəllifi olub, 40-dan artıq namizədlik və doktorluq dissertasiyasına rəhbərlik edib. Onun müəllifi olduğu ekologiya dərsliyi uzun illərdir tədris prosesində istifadə olunur və bir sıra xarici dillərə tərcümə edilib.Professor, həmçinin azərbaycanlı alimlər Urxan Ələkbərov, Sevda Məmmədəliyeva, Vilayət İsmayılov və İslam Mustafayev ilə birgə müxtəlif elmi layihələr həyata keçirir. Ötən il onun həmmüəllifi olduğu “Ekoloji sivilizasiya astanasında: yaşıl enerjiyə keçid” kitabı geniş maraq doğurub.
