Milli Məclisin sədri Sahibə Qafarova Tanzaniyada keçirilən Parlamentlərarası İttifaqın (PAİ) 153-cü Assambleyasının ümumi müzakirələrində Azərbaycanın mövqeyini səsləndirib.
Elpress.az xəbər verir ki, Aruşa şəhərində baş tutan tədbirdə çıxış edən Sahibə Qafarova effektiv idarəçiliyin yalnız dövlət təsisatlarının fəaliyyəti ilə məhdudlaşmadığını bildirib. Onun sözlərinə görə, cəmiyyətin qərar qəbuletmə prosesinə cəlb olunması, institutlara etimad və bərabər imkanların yaradılması da mühüm amillərdir.
Spiker parlamentlərin bu istiqamətdəki roluna diqqət çəkərək qeyd edib ki, qanunverici orqanlar vətəndaşların gözləntiləri ilə dövlət qərarları arasında əlaqə yaradır. Parlament nəzarəti, qanunvericilik fəaliyyəti və cəmiyyətlə dialoq idarəetmənin daha açıq və hesabatlı qurulmasına xidmət edir.
Sahibə Qafarova Azərbaycanda dövlət xidmətlərinin əlçatanlığının artırılması, rəqəmsal imkanların genişləndirilməsi və vətəndaş iştirakının gücləndirilməsi istiqamətində görülən işlərdən də danışıb. O bildirib ki, müasir texnologiyalar parlamentlə cəmiyyət arasında əlaqələrin inkişafına və qanunvericilik fəaliyyəti barədə məlumatların daha geniş auditoriyaya çatdırılmasına imkan yaradır.
Milli Məclisin sədri vətəndaşların və vətəndaş cəmiyyətinin qanunvericilik prosesində iştirakına imkan verən hüquqi və institusional mexanizmlərin mövcud olduğunu vurğulayıb. Bu baxımdan qanunvericilik təşəbbüsü hüququnu nümunə kimi göstərib.
Çıxışının sonunda Sahibə Qafarova PAİ-ni parlamentlər arasında təcrübə və fikir mübadiləsi üçün mühüm platforma kimi qiymətləndirib. O, bu əməkdaşlığın daha açıq, inklüziv və ictimai etimad qazanan institutların formalaşmasına töhfə verə biləcəyini bildirib.
