İtkin düşmüş şəxslərin taleyinin müəyyənləşdirilməsi üçün dəqiq məlumatların əldə olunması axtarış prosesinin əsas şərtlərindən biri kimi qiymətləndirilir.
Elpress.az xəbər verir ki, Prezident İlham Əliyev “İtkin düşmüş şəxslər üzrə Bakı Dialoqu çərçivəsində IV Beynəlxalq Konfrans”ın iştirakçılarına müraciətində insan taleləri ilə bağlı məlumatların siyasi şərtləndirmə predmetinə çevrilməməli olduğunu bildirib.
Dövlət başçısı qeyd edib ki, Ermənistan itkin düşmüş azərbaycanlıların taleyi, kütləvi və fərdi dəfn yerləri barədə malik olduğu bütün məlumatları təqdim etməli, arxiv materiallarına çıxışa və şahid ifadələrinin toplanmasına şərait yaratmalıdır.
İlham Əliyevin sözlərinə görə, bu addımlar yalnız hüquqi öhdəlik və humanitar məsuliyyət deyil, eyni zamanda sülhə sadiqliyin və qarşılıqlı etimadın gücləndirilməsinin göstəricisi ola bilər.
Prezident bildirib ki, Azərbaycan 2002-ci ildən BMT Baş Assambleyasında itkin düşmüş şəxslərlə bağlı qətnamələrin qəbul edilməsi istiqamətində təşəbbüslərlə çıxış edir.
Dövlət başçısı beynəlxalq səylərin bu sahədə daha da gücləndirilməsinin vacibliyini vurğulayıb. Onun sözlərinə görə, BMT və digər aidiyyəti beynəlxalq qurumlar axtarışların aparılması, məlumat mübadiləsi, məhkəmə-tibbi ekspertiza imkanlarının genişləndirilməsi və itkinlərin ailələrinə dəstəyin artırılması istiqamətində daha fəal rol oynamalıdırlar.
Qeyd edək ki, Prezidentin müraciəti Əsir və itkin düşmüş, girov götürülmüş vətəndaşlarla əlaqədar Dövlət Komissiyasının sədri, Dövlət Təhlükəsizliyi Xidmətinin rəisi Əli Nağıyev tərəfindən səsləndirilib.
