Dominikan Respublikasının paytaxtı Santo-Dominqoda 28 May – Müstəqillik Günü münasibətilə ilk dəfə rəsmi qəbul təşkil edilib.
Elpress.az AZƏRTAC-a istinadən xəbər verir ki, tədbirə Dominikan hökumətinin rəsmiləri, parlament üzvləri, diplomatik korpus nümayəndələri, media təmsilçiləri və ictimaiyyət nümayəndələri qatılıblar.Mərasim Azərbaycanın və Dominikan Respublikasının dövlət himnlərinin səsləndirilməsi ilə başlayıb. Daha sonra Azərbaycanın Dominikanda akkreditə olunmuş səfiri Ruslan Rzayev çıxış edərək tədbirin ilk dəfə Santo-Dominqoda keçirilməsinin əhəmiyyətini vurğulayıb.Diplomat Azərbaycan Xalq Cümhuriyyətinin tarixi rolundan, ölkəmizin müstəqilliyini bərpa etdikdən sonra keçdiyi inkişaf yolundan və beynəlxalq arenada qazandığı mövqedən danışıb. O, həmçinin işğaldan azad edilmiş ərazilərdə həyata keçirilən yenidənqurma layihələri, regional sülh təşəbbüsləri və Azərbaycanın ev sahibliyi etdiyi nüfuzlu beynəlxalq tədbirlər barədə məlumat verib.Səfir iki ölkə arasında münasibətlərin inkişaf etdiyini qeyd edərək, Azərbaycanın Dominikan Respublikası ilə əməkdaşlığın genişləndirilməsində maraqlı olduğunu bildirib. O, son dövrdə qarşılıqlı təmasların intensivləşdiyini və müxtəlif sahələr üzrə əməkdaşlıq üçün əlverişli imkanların mövcud olduğunu vurğulayıb.Tədbirdə çıxış edən Dominikan Respublikasının xarici işlər nazirinin müavini Huqo Fransisko Rivera Fernandes Azərbaycan xalqını Müstəqillik Günü münasibətilə təbrik edib. O, iki ölkə arasında siyasi, iqtisadi, turizm, təhsil və digər istiqamətlərdə əlaqələrin inkişafı üçün geniş potensialın olduğunu diqqətə çatdırıb.Qəbul çərçivəsində Azərbaycanın turizm imkanlarını əks etdirən təqdimatlar nümayiş olunub, həmçinin “Şəhərsalma və Memarlıq İli” çərçivəsində hazırlanan və ölkəmizin beynəlxalq şəhərsalma forumuna ev sahibliyini əks etdirən sərgi qonaqlara təqdim edilib.
