Azərbaycan azad edilmiş ərazilərdə aşkarlanan və Ermənistan hərbçilərinə aid olduğu ehtimal edilən qalıqların eyniləşdirilməsi məqsədilə qarşı tərəfə DNT nümunələrinin təqdim olunmasını təklif edib.
Elpress.az xəbər verir ki, bunu Dövlət Təhlükəsizliyi Xidmətinin rəisi, Əsir və itkin düşmüş, girov götürülmüş vətəndaşlarla əlaqədar Dövlət Komissiyasının sədri Əli Nağıyev “İtkin düşmüş şəxslər üzrə Bakı Dialoqu” çərçivəsində keçirilən IV Beynəlxalq Konfransda deyib.
Onun sözlərinə görə, Ermənistan tərəfindən 2026-cı ilin yanvarında təqdim edilən və itkin düşdüyü bildirilən 50 erməniəsilli şəxsin DNT profilləri ilə Azərbaycanda aşkarlanan qalıqlar arasında aparılan ekspertizalar nəticəsində uyğunluq müəyyən olunmayıb.
Ə.Nağıyev bildirib ki, hər iki tərəfin itkinlərinin taleyinin aydınlaşdırılması üçün əməkdaşlığa hazırdır. O qeyd edib ki, nəticə əldə etmək üçün dəqiq və tam məlumatların təqdim olunması vacibdir.
Dövlət Komissiyasının sədri Ermənistanın itkin düşmüş azərbaycanlıların taleyi, kütləvi və fərdi dəfn yerləri barədə məlumatları təqdim etməsinin, həmçinin arxivlərin açılması və şahid ifadələrinin toplanmasına şərait yaradılmasının zəruriliyini vurğulayıb.
Ə.Nağıyev qeyd edib ki, Dövlət Komissiyası 2025-ci ilin fevralından Ermənistanın aidiyyəti komissiyası ilə birbaşa təmaslar quraraq görüşlər və məlumat mübadiləsi həyata keçirir.
Onun sözlərinə görə, müxtəlif mənbələr və şahid ifadələri əsasında Birinci Qarabağ müharibəsi zamanı əsir və girov götürülərək beynəlxalq təşkilatlardan gizli saxlanıldığı bildirilən 834 Azərbaycan vətəndaşının siyahısı qarşı tərəfə təqdim edilib. Siyahıya daxil olan 104 nəfər barədə isə ətraflı məlumat verilib.
Ə.Nağıyev Beynəlxalq Qızıl Xaç Komitəsinin rəsmi qeydiyyatına alınmış 54 Azərbaycan vətəndaşı barədə də məlumatların qarşı tərəfə çatdırıldığını bildirib. Onlardan 17 nəfərin meyitinin qaytarıldığı, saxlanma yerlərində öldüyü bildirilən 33 şəxsin qalıqlarının isə hələ də təhvil verilmədiyi qeyd olunub. Daha 4 nəfərin taleyi barədə isə məlumat yoxdur.
