Gürcüstanın paytaxtında keçirilən “Tbilisoba” festivalında Azərbaycan mədəniyyəti və milli irsi geniş şəkildə təqdim edilib.
Elpress.az xəbər verir ki, Tbilisi Şəhəri Gününə həsr olunan ənənəvi festival çərçivəsində Azərbaycan guşəsi yaradılıb. Guşə “Gürcüstanın Aktiv Azərbaycanlı Qadınlar Assosiasiyası” və M.F.Axundzadə adına Azərbaycan Mədəniyyəti Muzeyinin birgə təşkilatçılığı ilə hazırlanıb.
Tədbir iştirakçılarına Azərbaycan milli mətbəxinin nümunələri təqdim olunub, ölkəmizin mədəni irsi ilə bağlı müxtəlif nümunələr nümayiş etdirilib. Tbilisi Meriyasının və bələdiyyənin nümayəndələri də Azərbaycan guşəsinə baş çəkərək milli təamlarımızın dadına baxıblar.
Festivalın musiqi proqramında “Ceyran” Azərbaycan rəqs ansamblının ifası da yer alıb. Kollektiv “Uzundərə” və “Sarı gəlin” rəqslərini təqdim edib və çıxış tamaşaçılar tərəfindən alqışlarla qarşılanıb.
Qeyd edək ki, 1979-cu ildən keçirilən “Tbilisoba” Tbilisinin tarixi, mədəni müxtəlifliyi və şəhərin ənənələrini nümayiş etdirən ənənəvi festivallardan biridir.
Azərbaycan mədəniyyətinin festivalda təqdim olunması Gürcüstanda yaşayan azərbaycanlıların milli irsin qorunmasına və iki ölkə xalqları arasında mədəni əlaqələrin inkişafına verdiyi töhfəni nümayiş etdirir.
