Macarıstanın Seqed şəhərində keçirilən kayak və kanoe üzrə gənclər və 23 yaşadək idmançılar arasında Avropa çempionatında Azərbaycan təmsilçisi Tatyana Smilovenko uğurlu çıxışı ilə diqqət çəkib.
Elpress.az xəbər verir ki, Azərbaycan millisinin üzvü 500 metr məsafəyə birnəfərlik kanoe yarışında final mərhələsində yüksək nəticə göstərərək fəxri kürsüyə yüksəlib.
İdmançı A finalında finiş xəttini ikinci keçərək Avropa çempionatının gümüş medalına layiq görülüb və Azərbaycanın aktivinə növbəti uğuru yazdırıb.
Bu nəticə Tatyana Smilovenkonun Azərbaycan millisinin heyətində qitə birinciliklərində qazandığı ikinci medal olub. O, ötən il Rumıniyanın Piteşti şəhərində keçirilən 23 yaşadək idmançılar arasında Avropa çempionatında bürünc medal əldə etmişdi. Bu dəfə isə nəticəsini yaxşılaşdıraraq Avropa ikincisi adına sahib çıxıb.
