Azərbaycanlı jurnalist Aqil Ələsgər Qazaxıstanın Almatı şəhərində keçirilən beynəlxalq tədbirdə xüsusi ordenə layiq görülüb. Təltif Türk dünyasında media və vətəndaş cəmiyyəti sahəsindəki fəaliyyətlə əlaqələndirilib.
Elpress.az xəbər verir ki, Aqil Ələsgər Oljas Süleymanovun 90 illik yubileyinə həsr olunan “Bilik mədəniyyətinə dəstək” IX Beynəlxalq Konfransında iştirak edib. Tədbirdə Mərkəzi Asiya və Türk dünyasının tarixi-mədəni əlaqələri, eləcə də intellektual irsin qorunması ilə bağlı məsələlər müzakirə olunub.
Konfrans çərçivəsində müxtəlif ölkələrdən media və vətəndaş cəmiyyəti nümayəndələri ilə görüşlər keçirən Aqil Ələsgər Azərbaycan mediasının Türk dünyasındakı əlaqələrinin inkişafı ilə bağlı fikir mübadiləsində iştirak edib.
Səfər zamanı jurnalistə Türk dünyasında media və vətəndaş cəmiyyətinin inkişafına, həmçinin dostluq münasibətlərinin möhkəmləndirilməsinə verdiyi töhfələrə görə Kəməl Tokayev adına “Kəməl Ata Kəməngər” ordeni təqdim olunub. Mükafatı UNESCO-nun nəzdində fəaliyyət göstərən Mədəniyyətlərin Yaxınlaşdırılması Mərkəzinin direktor müavini Səltənət Aşimova təqdim edib.
Qeyd edək ki, orden Kəməl Tokayevin adını daşıyır. O, tanınmış qazax yazıçısı olmaqla yanaşı, İkinci Dünya müharibəsinin iştirakçısı və Qazaxıstan Prezidenti Qasım-Comərd Tokayevin atasıdır.
