Müslüm Maqomayev adına Azərbaycan Dövlət Akademik Filarmoniyasının tələbələri Gürcüstanın paytaxtı Tbilisidə konsert proqramı ilə çıxış ediblər.
Elpress.az xəbər verir ki, Tbilisi Vano Saracişvili adına Dövlət Konservatoriyasında keçirilən tədbir filarmoniyanın “Gənclərin dəstəyi” layihəsi çərçivəsində təşkil olunub.Konsertdə azərbaycanlı və gürcü gənc musiqiçilər fortepianoda Azərbaycan, Gürcüstan və dünya bəstəkarlarının əsərlərini səsləndiriblər. İfaçılar arasında Suel Kərimli, Miray Fərzulla, Nuray Həsənli, Ümid Əsgərli İgan və Anisa Karmel Əsgərli ilə yanaşı, gürcü tələbələr də yer alıblar.Tədbirin yaddaqalan məqamlarından biri tamaşaçıların Nuray Həsənlinin Tbilisiyə həsr olunmuş mahnısına qoşularaq onu canlı ifa etməsi olub. Bu, konsertə xüsusi rəng qatıb və zalda səmimi ab-hava yaradıb.Təşkilatçılar bildiriblər ki, belə layihələr gənc istedadların inkişafına, Azərbaycan və Gürcüstan arasında mədəni əlaqələrin genişlənməsinə, eləcə də xalqlar arasında dostluğun möhkəmlənməsinə mühüm töhfə verir.Qeyd edək ki, konsertin 15 İyun – Milli Qurtuluş Gününə təsadüf etməsi tədbirə əlavə rəmzi məna qazandırıb.
