Azərbaycan inkişaf etməkdə olan kiçik ada dövlətlərinin iqlim dəyişmələrinin təsirlərinə qarşı mübarizəsinə dəstəyini davam etdirir.
Elpress.az xəbər verir ki, Prezident İlham Əliyev 2026-cı il Pre-COP Liderlər Tədbirinin iştirakçılarına müraciətində Azərbaycanın bu məqsədlə 5 il ərzində 10 milyon ABŞ dolları məbləğində yardım göstərəcəyini bildirib.
Dövlət başçısının sözlərinə görə, 2024-cü ildə Bakıda keçirilən COP29 çərçivəsində İnkişaf etməkdə olan Kiçik Ada Dövlətlərinin İqlim Dəyişmələri üzrə Liderlər Sammitinin təşkili həmin ölkələrin qarşılaşdığı problemlərin beynəlxalq gündəmdə daha geniş müzakirəsinə imkan yaradıb.
Azərbaycan bununla yanaşı, kiçik ada dövlətlərinə ikitərəfli əməkdaşlıq çərçivəsində də müxtəlif istiqamətlərdə dəstək verib. Bu çərçivədə təbii fəlakətlərin nəticələrinin aradan qaldırılması, su təminatı, ərzaq təhlükəsizliyi və mədəni irsin bərpası ilə bağlı layihələr həyata keçirilib.
Həmçinin 10-dan çox inkişaf etməkdə olan kiçik ada dövlətinin nümayəndələri Azərbaycanın Təhsil Qrantı Proqramından yararlanaraq ölkə universitetlərində təhsil almaq imkanı əldə ediblər.
İlham Əliyev qeyd edib ki, kiçik ada dövlətlərinin iqlim dəyişmələrinə davamlılığının artırılması istiqamətində 2024-cü ildə Azərbaycan ilə Millətlər Birliyi arasında Birgə Bəyannamənin imzalanması da mühüm addımlardan biridir.
