Azərbaycanda kibertəhlükəsizliyin gücləndirilməsi istiqamətində mühüm institusional dəyişiklik həyata keçirilir.
Prezident İlham Əliyevin imzaladığı fərmana əsasən, Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidmətinin bazasında Milli Kibertəhlükəsizlik Agentliyi publik hüquqi şəxs yaradılacaq.
Yeni qurumun əsas məqsədi dövlət informasiya sistemlərinin mühafizəsini gücləndirmək, kritik infrastrukturun təhlükəsizliyini təmin etmək, vətəndaşların fərdi məlumatlarını daha etibarlı qorumaq və kibertəhdidlərə operativ reaksiya mexanizmlərini təkmilləşdirməkdir.
Mütəxəssislərin fikrincə, rəqəmsal xidmətlərin genişlənməsi ilə paralel olaraq kiberdələduzluq, fişinq hücumları, bank kartı məlumatlarının oğurlanması və dövlət informasiya sistemlərinə yönələn kiberhücumların sayı da artır.
Yeni agentliyin yaradılması bu risklərin vahid mərkəzdən idarə olunmasına və təhlükəsizlik tədbirlərinin koordinasiyalı şəkildə həyata keçirilməsinə imkan verəcək.Kibertəhlükəsizlik üzrə ekspert Kamran Kərimli bildirib ki, aparılan islahatlar nəticəsində dövlət və özəl sektorun rəqəmsal sistemləri daha etibarlı qorunacaq, kibertəhdidlərə daha çevik müdaxilə ediləcək və elektron xidmətlərə ictimai etimad güclənəcək.
Ekspertin sözlərinə görə, süni intellekt texnologiyalarının tətbiqi və Hökumət Buludu (G-Cloud) platformasının inkişafı da kibermüdafiə imkanlarını yeni mərhələyə yüksəldəcək. Bu yanaşma təhlükələrin daha erkən aşkarlanmasına, dövlət xidmətlərinin fasiləsiz fəaliyyətinin təmin olunmasına və rəqəmsal təhlükəsizlik ekosisteminin möhkəmləndirilməsinə şərait yaradacaq.Qeyd olunur ki, həyata keçirilən islahatlar Azərbaycanın rəqəmsal inkişaf strategiyasının mühüm tərkib hissəsi olmaqla yanaşı, ölkənin kibertəhlükəsizlik sahəsində institusional potensialının gücləndirilməsinə və rəqəmsal iqtisadiyyatın dayanıqlı inkişafına xidmət edəcək.
