Elpress.az xəbər verir ki, Bakının Yasamal rayonunda baş verən partlayışla bağlı yeni məlumatlar açıqlanıb.
Fövqəladə Hallar Nazirliyinin yaydığı məlumata görə, hadisə Ümid Ələkbərov küçəsində yerləşən ikimərtəbəli yaşayış evinin birinci mərtəbəsində qeydə alınıb.
Partlayışdan sonra başlayan yanğın əraziyə cəlb olunan yanğınsöndürənlərin operativ müdaxiləsi nəticəsində qısa müddətdə lokallaşdırılaraq tam söndürülüb.Hadisə zamanı ümumi sahəsi 250 kvadratmetr olan yaşayış evinin birinci mərtəbəsindəki iki otaq 50 kvadratmetr sahədə yanaraq yararsız vəziyyətə düşüb.
Partlayış nəticəsində 2010-cu il təvəllüdlü bir uşağın həyatını itirdiyi bildirilir. Bundan başqa, üç nəfər müxtəlif dərəcəli yanıq xəsarətləri alaraq Nərimanov Tibb Mərkəzinin nəzdində fəaliyyət göstərən Yanıq Mərkəzinə yerləşdirilib.
Həkimlərin nəzarətində olan yaralıların vəziyyəti ağır qiymətləndirilir.TƏBİB-in məlumatına əsasən, hadisə yerinin yaxınlığında olan daha bir qadın xəsarət alıb. Ona Kliniki Tibbi Mərkəzdə zəruri tibbi yardım göstərilib, vəziyyəti stabil olduğundan ambulator müalicə üçün evə buraxılması nəzərdə tutulur.
Hazırda partlayışın başvermə səbəbi araşdırılır. Hadisə ilə bağlı müvafiq qurumlar tərəfindən araşdırma davam etdirilir.
