Beynəlxalq axtarışa verilmiş şəxslərin ölkəyə qaytarılması istiqamətində görülən tədbirlər çərçivəsində daha bir şəxsin ekstradisiyası həyata keçirilib.
Elpress.az xəbər verir ki, bu barədə Ədliyyə Nazirliyinin Mətbuat Xidməti məlumat yayıb.Məlumata görə, İnterpolun Azərbaycan Respublikasındakı Milli Mərkəzi Bürosu tərəfindən beynəlxalq axtarışa verilən Azərbaycan vətəndaşı Polad Babayevin olduğu yer Birləşmiş Ərəb Əmirliklərində müəyyən edilib və o, həmin ölkədə saxlanılıb.İstintaq materiallarına əsasən, Polad Babayev 2022-ci ildən başlayaraq bir qrup vətəndaşı əlillik pensiyası təyin etdirmək və ya işlə təmin etmək vədi ilə aldadaraq onların vəsaitlərini ələ keçirməkdə təqsirləndirilir. Ona qarşı Azərbaycan Respublikası Cinayət Məcəlləsinin dələduzluq maddələri ilə ittiham irəli sürülüb.Beynəlxalq hüquqi prosedurlar tamamlandıqdan və aidiyyəti qurumlar arasında aparılan danışıqlardan sonra onun Azərbaycana təhvil verilməsinə razılıq əldə olunub.Təqsirləndirilən şəxs Ədliyyə Nazirliyinin əməkdaşlarının müşayiəti ilə Dubay şəhərindən Bakıya gətirilib. Məhkəmənin qərarına uyğun olaraq, o, istintaq dövrü üçün müvafiq təcridxanaya yerləşdirilib.Ədliyyə Nazirliyi bildirib ki, xaricdə gizlənən və cinayət məsuliyyətindən yayınmağa çalışan şəxslərin aşkarlanaraq ölkəyə gətirilməsi istiqamətində beynəlxalq əməkdaşlıq tədbirləri davam etdirilir.
