Türkiyədə axtarışda olan “Survivor” yarışmasının iştirakçısı Hikmet Tuğsuz və “Sıfır Bir” serialı ilə tanınan aktyor Cengizhan Yurdutek xaricdə saxlanılaraq Türkiyəyə gətirilib.
Elpress.az xəbər verir ki, “Sabah” qəzetinin məlumatına görə, Türkiyənin Daxili İşlər Nazirliyi qırmızı bülletenlə axtarılan 33 nəfər də daxil olmaqla, ümumilikdə 63 şəxsin səkkiz ölkədən Türkiyəyə ekstradisiya edildiyini açıqlayıb.
Məlumata əsasən, “Survivor” layihəsində iştirakı ilə tanınan Hikmet Tuğsuz sentyabrın 25-də Gürcüstanda saxlanılıb. Onun barəsində şəxsi məlumatları qanunsuz əldə etmə, qəsdən xəsarət yetirmə, dələduzluq və prezidentə təhqir kimi ittihamlarla bağlı həbs qərarlarının olduğu bildirilir.
Aktyor Cengizhan Yurdutekin isə oktyabrın 10-da Monteneqroda saxlanılaraq Türkiyəyə təhvil verildiyi qeyd olunur. O, qəsdən xəsarət yetirmə, narkotik və ya psixotrop maddələrin qanunsuz dövriyyəsi ilə bağlı işlər üzrə axtarışda olub.
Qeyd edək ki, bu məlumatlar Türkiyə mediasının və Daxili İşlər Nazirliyinin açıqlamasına istinadən yayılıb. Barələrində ittihamlar irəli sürülən şəxslərin təqsiri məhkəmənin qanuni qüvvəyə minmiş hökmü ilə müəyyən edilməlidir.
