Azərbaycanın Baş prokuroru Türküstanda keçirilən beynəlxalq toplantıda çıxış edib
Elpress.az xəbər verir ki, Azərbaycanın Baş prokuroru Kamran Əliyev İqtisadi Əməkdaşlıq Təşkilatına üzv dövlətlərin Baş prokurorlarının Türküstan şəhərində keçirilən 7-ci iclasında iştirak edib.Tədbirdə çıxış edən Kamran Əliyev Azərbaycanda rəqəmsal transformasiya istiqamətində həyata keçirilən tədbirlərdən danışıb. O, “Elektron Prokurorluq” İnformasiya Sisteminin bu sahədə mühüm layihələrdən biri olduğunu qeyd edib. Bildirilib ki, sistem elektron sənəd dövriyyəsi, istintaq, dövlət ittihamı, beynəlxalq hüquqi əməkdaşlıq və digər istiqamətləri əhatə edir, bəzi modullarda isə süni intellekt texnologiyalarından istifadə olunur.Səfər çərçivəsində Kamran Əliyev İran və Pakistan nümayəndə heyətləri ilə də ikitərəfli görüşlər keçirib. Görüşlərdə hüquq-mühafizə orqanları arasında əməkdaşlığın genişləndirilməsi, məlumat və təcrübə mübadiləsi, qarşılıqlı hüquqi yardım, ekstradisiya və transmilli cinayətkarlığa qarşı mübarizə məsələləri müzakirə olunub.İran nümayəndə heyəti ilə görüşdə regionda baş verən hadisələr fonunda Azərbaycandan göstərilən humanitar yardıma görə təşəkkür ifadə edilib. Tərəflər terrorçuluq, narkotik vasitələrin qanunsuz dövriyyəsi və digər cinayətkarlıq formalarına qarşı birgə fəaliyyətin gücləndirilməsinin vacibliyini vurğulayıblar.
