Azərbaycan vətəndaşlarının Yaponiyaya vizasız səfər etməsi imkanının yaradılması gündəmə gətirilib.
Elpress.az xəbər verir ki, bu barədə Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Bakı Mədəniyyət və Media Dialoqu Platformasının “Sülh dili və dezinformasiya ilə mübarizə” mövzusunda keçirilən xüsusi sessiyasında danışıb.
Hikmət Hacıyev bildirib ki, hazırda Yaponiya vətəndaşları üçün Azərbaycana bir il müddətinə vizasız gediş-gəliş imkanı mövcuddur. O, Azərbaycan vətəndaşlarının da Yaponiyaya vizasız səfər etmək istədiklərini qeyd edərək, bu imkanın yaradılmasının mümkünlüyünü vurğulayıb.
Prezidentin köməkçisi çıxışında Yaponiyanın Azərbaycanda çəkilmiş filmi ilə bağlı da fikirlərini bölüşüb və ekran əsərinin maraqlı layihələrdən biri olduğunu bildirib. O, filmin ərsəyə gəlməsində iştirak edən yaponiyalı mütəxəssislərə təşəkkür edib.
Qeyd edək ki, Azərbaycan vətəndaşlarının Yaponiyaya vizasız səfər etməsi ilə bağlı səsləndirilən fikir hələlik mümkün təşəbbüs kimi təqdim olunub. Vizasız rejimin tətbiq ediləcəyi barədə rəsmi qərar açıqlanmayıb.
