Azərbaycanda tikinti layihələrinin həyata keçirilməsi sahəsində inzibati prosedurların təkmilləşdirilməsi və dövlət qurumları arasında koordinasiyanın gücləndirilməsi məqsədilə yeni komissiya yaradılıb.
Elpress.az xəbər verir ki, Prezident İlham Əliyev oktyabrın 26-da Tikinti Layihələri üzrə Koordinasiya Komissiyasının yaradılması haqqında Sərəncam imzalayıb.
Sərəncama əsasən, komissiyanın sədri Azərbaycan Respublikası Baş nazirinin müavini Şahin Mustafayev təyin edilib. Komissiyanın tərkibinə bir sıra dövlət qurumlarının rəhbər vəzifəli şəxsləri daxil olunub.
Yeni komissiyanın əsas vəzifələri dövlət vəsaiti hesabına maliyyələşdirilən tikinti layihələrinin icrasında yaranan gecikmələrin səbəblərini araşdırmaq, tikintiyə icazə və razılaşdırma prosedurlarına nəzarəti gücləndirmək, həmçinin dövlət qurumlarının fəaliyyətini əlaqələndirməkdir.
Sərəncama görə, komissiya altı ay müddətində tikinti layihələri üzrə inzibati prosedurların sadələşdirilməsi, icra mərhələlərinin və müddətlərinin optimallaşdırılması ilə bağlı təkliflərini Prezidentə təqdim etməlidir.
Bundan başqa, özəl sektorun maliyyələşdirdiyi tikinti layihələrinə investisiyaların təşviqi, rəqəmsal alətlərdən istifadə etməklə şəffaf mexanizmlərin yaradılması, eləcə də dövlət layihələrində smeta və qiymətqoyma sistemlərinin təkmilləşdirilməsi istiqamətində təkliflərin hazırlanması nəzərdə tutulur.
Rəqəmsal İnkişaf və Nəqliyyat Nazirliyinə də tikintiyə icazələrlə bağlı məlumatların vahid bazada toplanması və dövlət qurumları arasında elektron məlumat mübadiləsinin təkmilləşdirilməsi üzrə təkliflər hazırlamaq tapşırılıb.
