Azərbaycan Prezidenti İlham Əliyev BMT Baş katibinin müavini, BMT-nin Sivilizasiyalar Alyansının ali nümayəndəsi və islamofobiya ilə mübarizə üzrə xüsusi elçisi Migel Anxel Moratinosa ilə görüşüb.
Elpress.az xəbər verir ki, görüş oktyabrın 26-da baş tutub. Moratinos Azərbaycanda növbəti Ümumdünya Mədəniyyətlərarası Dialoq Forumunun təşkili münasibətilə təbriklərini çatdırıb və tədbirin beynəlxalq səviyyədə mədəniyyətlərarası və dinlərarası dialoqun təşviqində əhəmiyyətini vurğulayıb.
Qonaq Azərbaycanın BMT-nin Sivilizasiyalar Alyansının fəaliyyətinə verdiyi dəstəyi yüksək qiymətləndirib. O, ölkəmizin islamofobiya ilə mübarizə sahəsindəki təşəbbüslərini və bu mövzuda beynəlxalq konfransların keçirilməsini də təqdir edib. Moratinos Azərbaycanın Alyansa könüllü maliyyə töhfələrinə görə də təşəkkürünü bildirib.
Prezident İlham Əliyev Azərbaycanla BMT-nin Sivilizasiyalar Alyansı arasında uzun illərdir uğurlu əməkdaşlığın mövcud olduğunu qeyd edib və ölkəmizin bu dəstəyi gələcəkdə də davam etdirəcəyini bildirib.
Görüşdə Azərbaycanda keçirilən Mədəniyyətlərarası Dialoq Forumunun aktual beynəlxalq məsələlərin müzakirəsi və qarşılıqlı anlaşmanın gücləndirilməsi baxımından əhəmiyyəti vurğulanıb. Tərəflər, həmçinin gələcək əməkdaşlığın perspektivlərini müzakirə ediblər.
