Azərbaycanda mopedlərin istismarı ilə bağlı tələblərin sərtləşdirilməsi nəzərdə tutulur.
Yeni dəyişikliklərə əsasən, bu nəqliyyat vasitələrinin sahibləri bir sıra əlavə öhdəlikləri yerinə yetirməli olacaqlar.Elpress.az FED.az-a istinadən xəbər verir ki, məsələ Milli Məclisin İqtisadi siyasət, sənaye və sahibkarlıq komitəsinin iclasında müzakirəyə çıxarılan qanunvericilik dəyişikliklərində əksini tapıb.Təklif olunan yeniliklərə görə, mopedlər dövlət qeydiyyatına alınacaq, onlara qeydiyyat nişanı veriləcək və müvafiq qeydiyyat sənədi təqdim olunacaq. Həmçinin bu nəqliyyat vasitələrini idarə etmək istəyən şəxslərdən A1 kateqoriyası üzrə sürücülük vəsiqəsi tələb ediləcək.Qanun layihəsində moped sürücülərinin də digər nəqliyyat vasitələrinin sürücüləri kimi yol hərəkəti qaydalarına dair müəyyən öhdəliklər daşıması nəzərdə tutulur.Bundan başqa, qeydiyyata alınmış mopedlər üçün icbari sığorta tətbiq ediləcək. Eyni zamanda, onların mütəmadi texniki baxışdan keçirilməsi də məcburi olacaq.Layihədə müxtəlif xidmətlər üzrə dövlət rüsumları da müəyyənləşdirilib. Belə ki, texniki baxış üçün 15 manat, dövlət qeydiyyatı üçün 10 manat, qeydiyyat nişanının verilməsinə görə 15 manat ödəniş nəzərdə tutulur. A1 kateqoriyalı sürücülük vəsiqəsinin alınması və ya dəyişdirilməsi 30 manata başa gələcək. İmtahan üçün 40 manat, təkrar imtahan üçün isə 20 manat rüsum müəyyən edilib.Dəyişikliklərə əsasən, mopedlər avtomobil yollarından istifadə edən nəqliyyat vasitələri sırasına daha geniş şəkildə daxil ediləcək və onların yol hərəkəti sistemində hüquqi statusu daha dəqiq tənzimlənəcək.
