Moskvada Azərbaycanın xarici işlər naziri Ceyhun Bayramov ilə Rusiyanın xarici işlər naziri Sergey Lavrov arasında keçirilən görüşdə iki ölkə arasında əməkdaşlığın müxtəlif istiqamətləri ətrafında geniş fikir mübadiləsi aparılıb.
Elpress.az xəbər verir ki , Azərbaycan Xarici İşlər Nazirliyinin məlumatına görə, görüş zamanı siyasi, iqtisadi-ticarət, nəqliyyat və humanitar sahələrdə əməkdaşlıq, eləcə də regional və beynəlxalq təhlükəsizlik məsələləri müzakirə olunub. Tərəflər Azərbaycan-Rusiya münasibətlərinin qarşılıqlı hörmət və milli maraqların nəzərə alınması prinsipləri əsasında inkişaf etdirilməsinin vacibliyini vurğulayıb, ali və yüksək səviyyədə əldə edilmiş razılaşmaların icra vəziyyətini nəzərdən keçiriblər.Nazirlər ticarət-iqtisadi əlaqələrin genişləndirilməsi, Hökumətlərarası İqtisadi Əməkdaşlıq Komissiyasının fəaliyyəti və Azərbaycan-Rusiya İşgüzar Şurasının rolu barədə də fikir mübadiləsi aparıblar. Eyni zamanda, qlobal iqtisadi çətinliklərə baxmayaraq, iki ölkə arasında ticarət dövriyyəsinin müsbət dinamika ilə davam etdiyi bildirilib.Görüşdə regional nəqliyyat layihələrinin və nəqliyyat bağlantılarının inkişafının regionun iqtisadi dayanıqlığının gücləndirilməsində mühüm rol oynadığı qeyd olunub. Bildirilib ki, bu layihələr qarşılıqlı fayda prinsipi əsasında həyata keçirilməli, etimadın möhkəmlənməsinə, iqtisadi inkişafın genişlənməsinə, eləcə də regionda sülh və sabitliyin təmin olunmasına töhfə verməlidir.Tərəflər həmçinin qarşılıqlı maraq doğuran digər ikitərəfli, regional və beynəlxalq məsələləri müzakirə edib, görüşdən sonra keçirilən birgə mətbuat konfransında jurnalistlərin suallarını cavablandırıblar.Səfər çərçivəsində Azərbaycan və Rusiya Xarici İşlər nazirlikləri arasında 2026–2027-ci illər üzrə Məsləhətləşmələr Planı da imzalanıb.
