Seneqal nümayəndə heyəti Azərbaycanda sosial xidmətlərin rəqəmsallaşdırılması təcrübəsi ilə tanış olub
Elpress.az xəbər verir ki, Seneqal Respublikasının dövlət qulluğu, əmək və ictimai xidmətlərin islahatı naziri Mamadou Lamine Diante rəhbərlik etdiyi nümayəndə heyəti ilə Azərbaycanda DOST Agentliyinin 1 saylı DOST Mərkəzini ziyarət edib.Səfər çərçivəsində keçirilən görüşdə əmək və əhalinin sosial müdafiəsi naziri Anar Əliyev DOST Agentliyinin və DOST Mərkəzlərinin fəaliyyəti barədə məlumat verib. Bildirilib ki, DOST Agentliyi Prezident İlham Əliyevin 9 avqust 2018-ci il tarixli Fərmanı əsasında yaradılıb.Görüşdə DOST konsepsiyasının dövlət sosial xidmətlərinin “bir pəncərə” prinsipi ilə şəffaf, operativ və vətəndaş məmnunluğuna uyğun şəkildə göstərilməsinə imkan verdiyi vurğulanıb. Nümayəndə heyətinə DOST xidmətləri və Azərbaycanın sosial sahədə əldə etdiyi rəqəmsal nailiyyətlər barədə təqdimatlar keçirilib.Anar Əliyev Azərbaycan-Seneqal münasibətlərinin qarşılıqlı hörmət və dostluq əsasında inkişaf etdiyini bildirib. O, əmək və sosial müdafiə sahələrində də ikitərəfli əlaqələrin genişləndirilməsi üçün imkanların olduğunu qeyd edib.Azərbaycanın sosial sahədə həyata keçirdiyi islahatlar barədə Seneqal nümayəndə heyətinə məlumat verilib. Həmçinin İslam Əməkdaşlıq Təşkilatının Əmək Mərkəzinin üzv dövlətlər arasında əmək, məşğulluq və sosial müdafiə sahələrində əməkdaşlığın inkişafı baxımından əhəmiyyəti qeyd olunub.Görüşdə DOST modelinin beynəlxalq səviyyədə yüksək qiymətləndirildiyi bildirilib. Seneqal tərəfinin də bu konsepsiyaya maraq göstərdiyi diqqətə çatdırılıb. Azərbaycanın əmək münasibətləri, DOST Mərkəzlərinin fəaliyyəti və sosial xidmətlərin rəqəmsallaşdırılması sahəsindəki təcrübəsini Seneqal ilə bölüşməyə hazır olduğu vurğulanıb.Mamadou Lamine Diante iki ölkə arasında əlaqələrin inkişafından məmnunluğunu ifadə edib. O, islahatlar çərçivəsində iki nazirlik arasında əməkdaşlığın genişləndirilməsində və mütəmadi təcrübə mübadiləsinin aparılmasında maraqlı olduqlarını bildirib.Tərəflər əmək və məşğulluq, sosial dialoqun inkişafı, sosial xidmətlərin rəqəmsallaşdırılması, təcrübə mübadiləsi və iki nazirlik arasında əməkdaşlığın hüquqi əsaslarının formalaşdırılması istiqamətlərində gələcək əməkdaşlıq imkanlarını müzakirə ediblər.
