Səudiyyə Ərəbistanında məsciddə törədildiyi bildirilən əxlaqsız hərəkətlərlə bağlı ölüm hökmünə məhkum edilmiş iki Banqladeş vətəndaşı edam olunub. Hadisənin detalları açıqlanmadığı üçün Banqladeş tərəfi Səudiyyə Ərəbistanından rəsmi izahat tələb edib.
Elpress.az xəbər verir ki, Səudiyyə Ərəbistanının Daxili İşlər Nazirliyinin məlumatına görə, Nazrul İslam Abdul Basir və Siti Axtər adlı şəxslər oktyabrın 14-də Məkkə bölgəsində edam ediliblər.
Rəsmi açıqlamada onların məsciddə törətdikləri iddia olunan hərəkətlərin mahiyyəti, hadisənin baş verdiyi məscidin adı və cinayətin tarixi barədə məlumat verilməyib. Nazirlik bildirib ki, araşdırmadan sonra iş məhkəməyə göndərilib, ölüm hökmü yuxarı instansiyada təsdiqlənib və kral fərmanından sonra icra olunub.
Banqladeşin Ciddədəki Baş Konsulluğu vətəndaşlarının edamı barədə əvvəlcədən məlumat almadığını açıqlayıb. Konsulluq məsələ ilə bağlı Səudiyyə Ərəbistanının Xarici İşlər Nazirliyinə rəsmi müraciət edərək işin təfərrüatlarını istəyib.
Banqladeş Xarici İşlər Nazirliyinin nümayəndələri oktyabrın 18-də Səudiyyə Ərəbistanının səfiri ilə də görüşüblər. Görüş zamanı daha əvvəl göndərilmiş diplomatik müraciətin surəti təqdim edilib. Banqladeş tərəfi vətəndaşlarının kimliyi, onlara qarşı irəli sürülən ittihamlar və edam qərarının əsasları barədə aydınlıq gətirilməsini istəyir.
