Hökm qüvvəyə mindikdən sonra zərərçəkmiş şəxslə barışıq əldə edilməsi təyin olunmuş cəzanın yenidən nəzərdən keçirilməsi üçün avtomatik hüquqi əsas yaratmır.
Elpress.az xəbər verir ki, Ali Məhkəmə bu məsələyə dair hüquqi mövqeyini açıqlayıb.
İş materiallarına görə, 2018-ci ildə 12 il müddətinə azadlıqdan məhrum edilmiş şəxs 2023-cü ildə zərərçəkmişlə barışıb. Zərərçəkmiş notariat qaydasında təsdiqlənmiş ərizəsində məhkuma qarşı şikayət və tələbinin olmadığını bildirib.
Məhkum barışıq faktını cəzanı yüngülləşdirən hal kimi əsas gətirərək cəzasının azaldılması üçün məhkəməyə müraciət edib. Lakin birinci instansiya məhkəməsi ərizəni təmin etməyib, apellyasiya instansiyası da bu qərarı qüvvədə saxlayıb.
Ali Məhkəmə bildirib ki, hökm qanuni qüvvəyə mindikdən sonra cəzanın dəyişdirilməsi yalnız qanunvericilikdə nəzərdə tutulan maddi-hüquqi əsaslar və prosessual mexanizmlər çərçivəsində mümkündür. Hökmün icrası mərhələsində belə müraciətə baxılması üçün qanuni əsas olmayıb.
Məhkəmə vurğulayıb ki, bu mövqe barışığın cəzanı yüngülləşdirən hal kimi hüquqi əhəmiyyətinin qiymətləndirilməsi deyil, müraciətə hökmün icrası qaydasında baxılması üçün prosessual əsasın olmaması ilə bağlıdır.
Nəticədə Ali Məhkəmə kassasiya şikayətini təmin etməyib, aşağı instansiya məhkəmələrinin qərarlarını ləğv edib və cəzanın azaldılması barədə ərizənin hökmün icrası qaydasında icraata qəbulundan imtina edib.
