Hərbi hissəni özbaşına tərk edən və xidmət yerinə üzrsüz səbəbdən vaxtında qayıtmayan bəzi hərbi qulluqçular üçün yeni maliyyə sanksiyaları və inzibati həbs nəzərdə tutulur.
Elpress.az xəbər verir ki, bununla bağlı İnzibati Xətalar Məcəlləsinə dəyişiklik layihəsi Milli Məclisin Hüquq siyasəti və dövlət quruculuğu komitəsində müzakirə olunub.
Təklifə əsasən, zabit, gizir, miçman və müddətdən artıq həqiqi hərbi xidmət keçən hərbi qulluqçunun xidmət yerini özbaşına tərk etməsi və ya üzrlü səbəb olmadan bir gündən artıq, 10 gündən çox olmayaraq xidmətə gəlməməsi 200–300 manat cərimə ilə nəticələnə bilər. Pozuntunun hallarından asılı olaraq 15 günədək inzibati həbs də tətbiq oluna bilər.
Eyni pozuntunun inzibati tənbeh barədə qərar qüvvəyə mindikdən sonra bir il ərzində təkrar törədilməsi üçün isə 300–500 manat cərimə və ya 10 gündən bir ayadək inzibati həbs təklif edilir.
Dəyişiklik hələ qanun layihəsi mərhələsindədir. Təklifin qüvvəyə minməsi üçün qanunvericiliklə nəzərdə tutulan qəbul və təsdiq prosedurları tamamlanmalıdır.
