Azərbaycanın xarici işlər naziri Ceyhun Bayramov BMT Baş katibinin yol təhlükəsizliyi üzrə xüsusi elçisi Jan Todtu qəbul edib. Görüşdə ikitərəfli əməkdaşlıq və yol təhlükəsizliyi ilə bağlı məsələlər müzakirə olunub.
Elpress.az-ın Apa.az-a istinadən verdiyi məlumata əsasən, Azərbaycan Respublikasının xarici işlər naziri Ceyhun Bayramov ölkəmizdə səfərdə olan BMT Baş katibinin yol təhlükəsizliyi üzrə xüsusi elçisi Jan Todt ilə görüş keçirib. Görüşdə Azərbaycan ilə BMT arasında mövcud əməkdaşlıq, yol təhlükəsizliyi sahəsində beynəlxalq təşəbbüslər və qarşılıqlı maraq doğuran digər məsələlər ətrafında fikir mübadiləsi aparılıb.Nazir Ceyhun Bayramov görüş zamanı Azərbaycanın Dayanıqlı İnkişaf Məqsədlərinin icrası, müasir və təhlükəsiz nəqliyyat sisteminin formalaşdırılması, eləcə də yol hərəkəti təhlükəsizliyinin artırılması istiqamətində həyata keçirilən islahatlardan danışıb. O, nəqliyyat infrastrukturunun yenilənməsi, rəqəmsal texnologiyaların tətbiqi və yol təhlükəsizliyinin gücləndirilməsi istiqamətində görülən işləri diqqətə çatdırıb.Xarici işlər naziri, həmçinin işğaldan azad edilmiş ərazilərdə müasir yol və nəqliyyat infrastrukturunun qurulması istiqamətində genişmiqyaslı layihələrin uğurla icra olunduğunu vurğulayıb.BMT Baş katibinin xüsusi elçisi Jan Todt isə yol-nəqliyyat hadisələrinin qarşısının alınması, beynəlxalq əməkdaşlığın genişləndirilməsi və bu istiqamətdə həyata keçirilən qlobal təşəbbüslər barədə məlumat verib. O, Azərbaycanın yol təhlükəsizliyi sahəsində əldə etdiyi nailiyyətləri yüksək qiymətləndirərək əməkdaşlığın gələcəkdə də davam etdirilməsinin vacibliyini qeyd edib.Görüşdə tərəflər qarşılıqlı maraq doğuran digər məsələlər ətrafında da fikir mübadiləsi aparıblar.
