Bu gün Zəngilan şəhərinin işğaldan azad olunmasının altıncı ildönümüdür. 2020-ci il oktyabrın 20-də Azərbaycan Ordusunun nəzarətinə keçən şəhər və ətraf kəndlərdə sonrakı illərdə bərpa və yenidənqurma işlərinə başlanılıb.
Elpress.az xəbər verir ki, Prezident, Ali Baş Komandan İlham Əliyev həmin gün xalqa müraciəti zamanı Zəngilan şəhərinin, eləcə də rayonun Havalı, Zərnəli, Məmmədbəyli, Həkəri, Şərifan və Muğanlı kəndlərinin azad edildiyini elan edib.
Zəngilan istiqamətində aparılan döyüş əməliyyatları 44 günlük Vətən müharibəsi zamanı Azərbaycan Ordusunun Arazboyu irəliləyişində mühüm yer tutub. Rayonun azad olunması uğrunda döyüşlərdə fərqlənən hərbi qulluqçular Prezidentin 2020-ci il dekabrın 25-i və 2021-ci il iyunun 24-də imzaladığı sərəncamlarla “Zəngilanın azad olunmasına görə” medalı ilə təltif ediliblər.
Azadlıqdan sonra rayonun inkişafı üçün infrastruktur layihələri həyata keçirilib, ərazilərin minalardan təmizlənməsi ilə yanaşı, yaşayış məntəqələrinin bərpası və keçmiş məcburi köçkünlərin doğma torpaqlarına qayıdışı istiqamətində işlər görülüb. Bu proses çərçivəsində “ağıllı kənd” konsepsiyası əsasında yenidən qurulan Ağalı kəndinə sakinlərin köçürülməsinə başlanılıb. Zəngilana qayıdış 2022-ci ilin iyulundan etibarən mərhələli şəkildə həyata keçirilir.
Rayonun nəqliyyat imkanlarının genişləndirilməsi baxımından Zəngilan Beynəlxalq Hava Limanının inşası da mühüm layihələrdən biri olub. Aeroportun açılışı 2022-ci il oktyabrın 20-də keçirilib və ona beynəlxalq hava limanı statusu verilib.
Prezident İlham Əliyevin 2023-cü il iyulun 31-də imzaladığı sərəncama əsasən, oktyabrın 20-si hər il Zəngilan Şəhəri Günü kimi qeyd olunur.
