Azərbaycanda elektron ticarət qaydalarının yenilənməsi və ödəniş sistemlərinə dair qanunvericiliyin müasir texnologiyalara uyğunlaşdırılması təklif olunur. Dəyişikliklər çərçivəsində POS-terminal anlayışının da dəqiqləşdirilməsi nəzərdə tutulur.
Elpress.az xəbər verir ki, bununla bağlı “Elektron ticarət haqqında” qanuna dəyişiklik layihəsi Milli Məclisin İqtisadi siyasət, sənaye və sahibkarlıq komitəsinin iclasında müzakirəyə çıxarılıb.
Layihədə qanunun yalnız Azərbaycan ərazisində həyata keçirilən elektron ticarətə tətbiqini nəzərdə tutan məhdudiyyətin aradan qaldırılması, eləcə də “texnoloji neytrallıq” anlayışının qanunvericiliyə daxil edilməsi təklif olunur.
Sənəddə ödənişlərin həyata keçirilməsi ilə bağlı müddəaların təkmilləşdirilməsi və POS-terminal anlayışının mövcud təcrübəyə uyğunlaşdırılması da yer alıb. Bu dəyişikliklərin elektron ödəniş üsullarının inkişafına və qanunsuz ticarət əməliyyatlarının azaldılmasına xidmət etməsi nəzərdə tutulur.
Qeyd edək ki, elektron ticarət sahəsində normativ hüquqi bazanın təkmilləşdirilməsi 2022–2026-cı illər üzrə sosial-iqtisadi inkişaf Strategiyasının tədbirlər planında da əksini tapıb.
