20 Oktyabr – Energetiklər Günü münasibətilə enerji sektorunun nümayəndələri Azərbaycanın dövlətçilik tarixində mühüm xidmətləri olan şəxslərin və Vətən uğrunda həlak olan şəhidlərin xatirəsini yad ediblər.
Elpress.az xəbər verir ki, Energetika Nazirliyinin, “AzərEnerji” ASC-nin və “Azərişıq” ASC-nin rəhbərliyi və əməkdaşları əvvəlcə Fəxri xiyabana gələrək Ümummilli Lider Heydər Əliyevin məzarı önünə əklil və gül dəstələri qoyublar. Ziyarət zamanı akademik Zərifə Əliyevanın və dövlət xadimi Əziz Əliyevin də xatirəsi ehtiramla anılıb.
Daha sonra energetiklər Şəhidlər xiyabanında Azərbaycanın ərazi bütövlüyü və suverenliyi uğrunda həyatlarını itirən Vətən övladlarının məzarları üzərinə güllər düzüblər.
Qeyd edək ki, Azərbaycanda Energetiklər Günü hər il oktyabrın 20-də qeyd olunur. 1981-ci ilin həmin günündə Heydər Əliyevin təşəbbüsü və rəhbərliyi ilə Cənubi Qafqazın ilk böyük istilik elektrik stansiyası olan “Azərbaycan” İES-in birinci enerji bloku istifadəyə verilib.
Peşə bayramı Prezident İlham Əliyevin 2004-cü il oktyabrın 13-də imzaladığı 446 nömrəli sərəncamla təsis edilib.
