Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) rəhbərliyi Azərbaycanın təşkilatın inkişafında oynadığı rolu və diplomatik fəaliyyətini xüsusi qeyd edib.
Elpress.az-ın Azərtac.az-a istinadən verdiyi məlumata əsasən, AQEM-in Astanadakı qərargahında Azərbaycanın Qazaxıstandakı səfiri Ağalar Atamoğlanovun şərəfinə xüsusi tədbir keçirilib. Tədbir AQEM-in baş katibi, səfir Kayrat Sarıbayın təşəbbüsü ilə təşkil olunub. Görüşdə Qazaxıstanda fəaliyyət göstərən diplomatik nümayəndəliklərin təmsilçiləri iştirak ediblər.AQEM-in baş katibi Kayrat Sarıbay Azərbaycanın təşkilatın inkişafına verdiyi töhfələri yüksək qiymətləndirib. O bildirib ki, Ağalar Atamoğlanovun Qazaxıstandakı diplomatik fəaliyyəti AQEM üçün mühüm dövrə təsadüf edib və Azərbaycan səfirliyi ilə AQEM Katibliyi arasında səmərəli əməkdaşlıq formalaşıb.Qeyd olunub ki, Azərbaycanın sədrliyi dövründə təşkilat üzv dövlətlərlə birlikdə Astanada keçirilən Altıncı Zirvə Toplantısında qəbul edilmiş qərarların icrasını davam etdirir. Qarşıdakı AQEM Zirvə Toplantısının Bakıda keçirilməsi isə təşkilatın inkişafında növbəti mühüm mərhələ kimi qiymətləndirilib.Kayrat Sarıbay həmçinin Ağalar Atamoğlanovun Qazaxıstan Prezidenti tərəfindən II dərəcəli “Dostluq” ordeni ilə təltif edilməsini Azərbaycan-Qazaxıstan münasibətlərinin möhkəmləndirilməsinə verdiyi töhfənin göstəricisi kimi dəyərləndirib.Səfir Ağalar Atamoğlanov çıxışında Azərbaycanın AQEM çərçivəsində əməkdaşlığın inkişafına böyük önəm verdiyini bildirib. O qeyd edib ki, ölkəmiz təşkilatın Asiyada etimad və qarşılıqlı fəaliyyət mexanizmlərinin gücləndirilməsində mühüm platforma olduğunu hesab edir.Diplomat vurğulayıb ki, Azərbaycanın AQEM-ə sədrliyi dövründə bir sıra təşəbbüslər irəli sürülüb və mühüm tədbirlər həyata keçirilib. Onun sözlərinə görə, Bakıda keçiriləcək növbəti Zirvə Toplantısı sədrliyin mühüm mərhələsi olacaq.Tədbir çərçivəsində Ağalar Atamoğlanova L.N. Qumilyov adına Avrasiya Milli Universitetinin inkişafına verdiyi xüsusi töhfəyə görə ali məktəbin 30 illik yubiley medalı təqdim olunub.
