Mədəniyyət Nazirliyi sistemində fəaliyyət göstərən incəsənət məktəb və mərkəzlərinə işə qəbul üzrə test imtahanı keçiriləcək.
Elpress.az xəbər verir ki, bu barədə Dövlət İmtahan Mərkəzi (DİM) məlumat yayıb.Bildirilib ki, imtahan avqustun 8-də Azərbaycan Respublikası Mədəniyyət Nazirliyinin tabeliyində fəaliyyət göstərən incəsənət məktəb və mərkəzlərinə direktor, direktor müavini, həmçinin Azərbaycan və Naxçıvan Muxtar Respublikası Mədəniyyət nazirliklərinin tabeliyindəki incəsənət məktəb və mərkəzlərinə müəllim vəzifələrinə işə qəbul məqsədilə təşkil olunacaq.İmtahanda iştirak edəcək namizədlər DİM-in rəsmi internet saytına daxil olaraq “İmtahana buraxılış vərəqəsi”ni çap etməlidirlər.
Buraxılış vərəqəsində imtahanın keçiriləcəyi tarix, ünvan, zal, başlanma vaxtı və digər zəruri məlumatlar əks olunub.Məlumata görə, imtahanda iştirak etmək üçün ümumilikdə 1350 namizəd qeydiyyatdan keçib. Onlardan 121 nəfər direktor və direktor müavini, 1229 nəfər isə müəllim vəzifəsi üzrə imtahan verəcək.Namizədlər imtahan qaydaları ilə bağlı “Yaddaş kitabçası” vasitəsilə də tanış ola bilərlər.
