Qəbələ şəhərində Fövqəladə Hallar Nazirliyinin təşkilatçılığı, Gənclər və İdman Nazirliyi, eləcə də Elm və Təhsil Nazirliyinin dəstəyi ilə keçirilən “Gənc xilasedici” XII beynəlxalq yarışı və “Gənc xilasedici və yanğınsöndürən” XIII ümumrespublika birinciliyinin qalibləri mükafatlandırılıb.
Elpress.az xəbər verir ki, Qəbələ Mədəniyyət Mərkəzində təşkil olunan mərasimdə fövqəladə hallar naziri Kəmaləddin Heydərov, gənclər və idman naziri Fərid Qayıbov, elm və təhsil nazirinin müavini Firudin Qurbanov, Qəbələ Rayon İcra Hakimiyyətinin başçısı Səbuhi Abdullayev, digər rəsmi şəxslər, Vətən müharibəsi şəhidlərinin ailə üzvləri və övladları iştirak ediblər.
Yarış iştirakçıları “Maneələr zolağı”, “Kombinə edilmiş yanğın estafeti”, “Axtarış-xilasetmə işi” mərhələlərində, həmçinin “Mənim ölkəm, mənim komandam” müsabiqəsində bacarıqlarını nümayiş etdiriblər.
Yekun nəticələrə əsasən, beynəlxalq yarışın qalibi Azərbaycan komandası olub. Özbəkistan ikinci, Belarus isə üçüncü yeri tutub. Ümumrespublika birinciliyində isə İsmayıllı komandası birinci, Naxçıvan Muxtar Respublikası ikinci, Qusar komandası isə üçüncü pillədə qərarlaşıb.
Qaliblərə kubok, medal və diplomlar təqdim olunub, yarışın fərqlənən iştirakçıları müxtəlif mükafatlarla təltif ediliblər.
