Qurultayda türk dövlətlərinin musiqi sahəsində birgə layihələri müzakirə olunub
Elpress.az xəbər verir ki, XVIII Üzeyir Hacıbəyli Beynəlxalq Musiqi Festivalı çərçivəsində Bakıda Türk Dünyası Bəstəkarlarının I Qurultayı keçirilib.Azərbaycan Bəstəkarlar İttifaqında təşkil olunan tədbirdə türk dövlətlərindən olan bəstəkar təşkilatlarının rəhbərləri, musiqişünaslar, mədəniyyət və ictimaiyyət nümayəndələri, eləcə də media əməkdaşları iştirak ediblər.Mədəniyyət nazirinin müavini Murad Hüseynov çıxışında qurultayın türk dünyasının yaradıcı potensialını bir araya gətirmək, gənc bəstəkarları dəstəkləmək və ortaq musiqi irsinin təbliğinə töhfə vermək baxımından əhəmiyyətini vurğulayıb. O bildirib ki, tədbir yeni yaradıcılıq ideyalarının və əsərlərin meydana gəlməsinə, uzunmüddətli əməkdaşlıqların qurulmasına imkan yarada bilər.Bəstəkarlar İttifaqının sədri Firəngiz Əlizadə isə Türk dünyası bəstəkarlarını və musiqi sənətçilərini bir araya gətirəcək ortaq təşkilati strukturun yaradılmasının vacibliyini qeyd edib. O, xüsusilə akademik və ciddi musiqi əsərlərinin beynəlxalq səviyyədə tanıdılmasının əsas hədəflərdən biri olduğunu bildirib.Tədbirdə Türk dünyasının müasir musiqi kataloqunun hazırlanması, bəstəkar əsərlərinin beynəlxalq səviyyədə tanıdılması, nəşriyyatlar, festivallar, studiyalar və peşəkar agentliklərlə əməkdaşlığın genişləndirilməsi ilə bağlı təkliflər səsləndirilib.Özbəkistan Bəstəkarlar İttifaqının sədri Rüstəm Abdullayev ölkəsində son illərdə Azərbaycan musiqiçilərinin iştirakı ilə çoxsaylı konsertlərin keçirildiyini qeyd edib. O, iki ölkənin bəstəkar və ifaçıları arasında əməkdaşlığın gələcəkdə də davam etdiriləcəyini bildirib.Tədbirdə həmçinin mədəniyyətin xalqlar arasında əlaqələrin gücləndirilməsində rolu, musiqi irsinin qorunması və yaradıcı əməkdaşlığın genişləndirilməsi məsələləri diqqətə çatdırılıb.Qurultay çərçivəsində türk dövlətlərinin musiqi sahəsində ortaq layihələri və gələcək əməkdaşlıq perspektivləri müzakirə olunub.
