Tiktoker İlduzə Hacıyevanın (Arzum999) həbsindən sonra ötən il Mərdəkanda baş vermiş ölümlə nəticələnən yol-nəqliyyat hadisəsi yenidən ictimai müzakirələrin mərkəzinə düşüb.
Elpress.az xəbər verir ki, ABŞ-da yaşayan azərbaycanlı jurnalist Qənirə Atasova qəzada həyatını itirən Amal Məlikovun əvvəlki illərdə məhkum olunması ilə bağlı məhkəmə sənədlərini ictimailəşdirib.
Yayılan sənədlərdə bildirilir ki, Amal Məlikov 2021-ci ildə xuliqanlıq ittihamı ilə məhkəmə qarşısına çıxarılıb. Məhkəmə onu başqa bir şəxslə birlikdə ictimai asayişi pozmaq və zor tətbiqi ilə müşayiət olunan insidentdə təqsirli bilib.
Bundan başqa, sənədlərə əsasən, 2022-ci ildə onun üzərindən 2,262 qram heroin aşkarlanıb. Bu səbəbdən Cinayət Məcəlləsinin 234.1-ci maddəsi ilə təqsirli bilinən Amal Məlikov 1 il 6 ay azadlıqdan məhrum edilib, eyni zamanda narkomaniyadan məcburi müalicə təyin olunub.
Xatırladaq ki, faciə ötən ilin iyununda Mərdəkan qəsəbəsində baş verib. İstintaq materiallarına görə, İlduzə Hacıyevanın idarə etdiyi “Changan” markalı avtomobil sola dönmə manevri edərkən arxadan gələn “Mercedes”lə toqquşub. Zərbənin təsirindən idarəetmədən çıxan “Mercedes” maneəyə çırpılıb və bir neçə dəfə aşıb.
Nəticədə sürücü, 29 yaşlı Amal Məlikov hadisə yerində ölüb, avtomobildə olan həyat yoldaşı Sənubər Muradova isə ağır xəsarətlər alıb.
Məhkəmənin hökmü ilə İlduzə Hacıyeva 5 il 2 ay müddətinə azadlıqdan məhrum edilib və hökm elan olunduqdan dərhal sonra məhkəmə zalında həbs edilərək cəzasını çəkmək üçün cəzaçəkmə müəssisəsinə göndərilib.
