220 yerlik yeni məktəbdə musiqi, rəssamlıq, heykəltaraşlıq və digər yaradıcılıq istiqamətləri üzrə imkanlar yaradılıb
Elpress.az xəbər verir ki, Avqustun 26-da Bakının Bilgəh qəsəbəsində yeni incəsənət məktəbinin açılışı keçirilib.Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyeva və qızı Arzu Əliyeva açılış mərasimində iştirak ediblər. Mədəniyyət naziri Adil Kərimli məktəbdə görülən işlər barədə məlumat verib.Bildirilib ki, Bilgəh incəsənət məktəbi qəsəbə Mədəniyyət Evinin, 27 nömrəli uşaq musiqi məktəbinin və Sabunçu rayon mərkəzləşdirilmiş kitabxana sisteminin 10 nömrəli kitabxana filialının fəaliyyətlərinin optimallaşdırılması nəticəsində yaradılıb.1987-ci ildə inşa edilmiş əvvəlki inzibati bina uzun müddət istifadədən sonra yararsız vəziyyətə düşdüyündən Heydər Əliyev Fondu tərəfindən 220 yerlik yeni məktəb binası inşa olunub.Məktəb musiqi, nəzəriyyə, xor, fotoqrafiya, rəssamlıq, heykəltəraşlıq və dizayn otaqları ilə təchiz edilib. Burada həmçinin xoreoqrafiya və akt zalları, kitabxana, qarderob və yeməkxana fəaliyyət göstərəcək.Məktəbin ətrafında abadlıq və yaşıllaşdırma işləri də aparılıb.
