Ebola xəstəliyi Azərbaycanda endemik xəstəlik sayılmır və hazırkı şəraitdə ölkədə onun yayılma ehtimalı aşağı qiymətləndirilir.
Elpress.az-ın Apa.az-a istinadən verdiyi məlumata əsasən, Ebola xəstəliyi əsasən Afrika qitəsinin müəyyən ərazilərində müşahidə olunur və lokal xarakter daşıyır.Mərkəzdən verilən məlumata görə, beynəlxalq məlumatlar epidemiyanın digər bölgələrə geniş şəkildə yayılması riskinin hazırda məhdud olduğunu göstərir. Qeyd edilib ki, virus meyvə yarasaları, insanabənzər meymunlar kimi heyvanlarla, həmçinin yoluxmuş şəxslərin qanı və digər bioloji mayeləri ilə yaxın təmas nəticəsində ötürülür və gündəlik sosial əlaqələr vasitəsilə yayılmır. Bu səbəbdən əhali üçün epidemioloji təhlükənin aşağı səviyyədə olduğu vurğulanıb.Bildirilib ki, ölkədə mümkün risklərin qarşısını almaq məqsədilə epidemioloji nəzarət tədbirləri fasiləsiz davam etdirilir. Riskli ölkələrdən gələn və ya yoluxmuş şəxslərlə təmasda olmuş insanlar tibbi müşahidəyə cəlb edilir. Xəstəliyə şübhə yarandıqda isə laborator analizlərin aparılması üçün Xüsusi Təhlükəli İnfeksiyalara Nəzarət Mərkəzində lazımi laborator imkanlar və test sistemləri mövcuddur.Həmçinin qeyd olunub ki, hazırkı vəziyyətdə əhali üçün əlavə məhdudiyyətlərin tətbiqinə və ya xüsusi tədbirlərin görülməsinə ehtiyac yoxdur. Vətəndaşlara beynəlxalq səfərlər zamanı gigiyena qaydalarına əməl etmək və rəsmi məlumat mənbələrini izləmək tövsiyə edilir.Nazirlik vəziyyəti beynəlxalq təşkilatlarla əməkdaşlıq çərçivəsində davamlı nəzarətdə saxlayır və zərurət yaranacağı təqdirdə ictimaiyyətə operativ məlumat veriləcəyini bildirir.
