Böyük Qayıdış’ Dövlət Proqramı çərçivəsində Səhiyyə Nazirliyinin K.Y. Fərəcova adına Elmi-Tədqiqat Pediatriya İnstitutu 1 İyun – Uşaqların Beynəlxalq Müdafiəsi Günü münasibətilə Xankəndi şəhərində yaşayan uşaqlar üçün səyyar tibbi müayinə aksiyası təşkil edib.
Elpress.az-ın Azərtac.az-a istinadən verdiyi məlumata əsasən, Təşəbbüsün əsas məqsədi azad olunmuş ərazilərə qayıdan ailələrin övladlarının keyfiyyətli səhiyyə xidmətlərinə əlçatanlığını artırmaq və onların sağlam böyüməsinə dəstək vermək olub. Aksiya çərçivəsində Elmi-Tədqiqat Pediatriya İnstitutunun təcrübəli pediatr, nevroloq, kardioloq, endokrinoloq, oftalmoloq, otorinolarinqoloq və digər ixtisaslı həkimlərdən ibarət komandası uşaqları hərtərəfli müayinə edib. Müayinələr zamanı uşaqların sağlamlıq vəziyyəti dəyərləndirilib, profilaktik baxışlar aparılıb, zərurət yarandıqda laborator və instrumental yoxlamalar həyata keçirilib.Müayinə nəticəsində müəyyən edilən xəstəlik və sağlamlıq problemləri barədə valideynlərə ətraflı məlumat verilib, onlara fərdi tibbi tövsiyələr təqdim olunub. Eyni zamanda, ehtiyac olan hallarda uşaqların ixtisaslaşmış tibb müəssisələrinə yönləndirilməsi və sonrakı tibbi nəzarətin təşkili təmin edilib.Aksiya çərçivəsində valideynlərlə maarifləndirici görüşlər də keçirilib. Görüşlər zamanı uşaqların düzgün qidalanması, peyvəndlənmənin əhəmiyyəti, mövsümi xəstəliklərdən qorunma yolları, sağlam həyat tərzi və psixoloji inkişaf kimi mövzular ətrafında geniş məlumat verilib.Tibbi baxışlara ümumilikdə 310-a yaxın uşaq cəlb olunub.
