Rumıniya sahilləri yaxınlığında Azərbaycan və Ukrayna vətəndaşlarının olduğu yük gəmisinin batması ilə nəticələnən insident baş verib. Hadisədən sonra dənizdə axtarış-xilasetmə əməliyyatı başladılıb.
Elpress.az xəbər verir ki, “Khoryv” adlı, Komor adalarının bayrağı altında üzən gəmi Rumıniyanın Konstansa limanından təxminən 13 dəniz mili məsafədə batıb. Gəmidə 10 Ukrayna və 3 Azərbaycan vətəndaşı olmaqla ümumilikdə 13 nəfər olub.
Məlumata görə, hadisə zamanı bir nəfərin meyiti tapılıb, üç nəfər itkin düşüb, doqquz nəfər isə xilas edilib. Həlak olan şəxsin vətəndaşlığı hələ açıqlanmayıb.
İlkin məlumatlarda gəminin dron hücumuna məruz qaldığı, bundan sonra göyərtədə yanğın baş verdiyi bildirilir. Lakin insidentin dəqiq səbəbi hələlik rəsmən təsdiqlənməyib.
Gəmidən yerli vaxtla saat 10:00 radələrində təhlükə siqnalı daxil olub. Rumıniyanın müvafiq qurumları xilasetmə tədbirlərinə başlayıb. Axtarışlar davam edir, lakin əlverişsiz hava şəraiti əməliyyatları çətinləşdirir.
