Milli Hidrometeorologiya Xidməti yaxın günlərdə ölkənin bir sıra bölgələrində gözlənilən qeyri-sabit hava şəraiti ilə əlaqədar əhaliyə xəbərdarlıq edib.
Milli Hidrometeorologiya Xidməti iyulun 4-dən etibarən ölkə ərazisində hava şəraitinin dəyişəcəyi ilə bağlı rəsmi xəbərdarlıq yayıb. Məlumata əsasən, iyulun 4 və 5-də əsasən dağlıq və dağətəyi rayonlarda, iyulun 6-dan 8-i gündüz saatlarınadək isə bəzi bölgələrdə fasilələrlə yağış yağacağı proqnozlaşdırılır.Sinoptiklərin məlumatına görə, ayrı-ayrı ərazilərdə yağıntının leysan xarakterli və intensiv olacağı, şimşək çaxacağı, həmçinin dolu düşəcəyi ehtimal edilir. Qeyri-sabit hava şəraiti fonunda dağlıq rayonlarda əlverişsiz meteoroloji hadisələrin baş vermə riski də artır.Eyni zamanda, yağıntılar nəticəsində çaylarda sululuğun artacağı, bəzi dağ çaylarından isə qısamüddətli sel keçəcəyi proqnozlaşdırılır. Bu səbəbdən dağlıq və dağətəyi ərazilərdə yaşayan sakinlərə, eləcə də həmin istiqamətlərdə səfər etməyi planlaşdıran vətəndaşlara ehtiyatlı olmaları tövsiyə edilir.
